مش يلا ولا إيه؟؟

Once upon a time !!!

2006-02-25T17:51:00.000+02:00

A fool desert was asked one day why r u waiting for a snow to cover it, while u never met a rain before, desert replied " ALLAH created all of us , and we will meet each other one day !!! with ALLAH's will " and when it was asked about the reason of being hopeful to meet the white snow , it replied " I met the sky , wind , sun and moon, who met the snow too "

And when the desert asked the wind to tell snow that " snow , please I want to c u ?? " snow replied " I don’t like deserts cause u will swallow me and my beauty will disappear , cant u see my charm on the trees in the forests , at the peaks of mountains,
U must be fool , and if u really wants to c me , u must be strong and stiff and move
Towards me , this is the case I can meet u "

Desert knew that it always dreamt by a thing never saw it before , maybe it seems to be beautiful when he heard about it , and may be its suitable for others but not for it !!

ALLAH created every element in the world with its charm and role , and we must not
dream about what we hear, we must dream about what we really want to be , I think this is Vision , we have to be ourselves with our vision , not others vision!!

to be continued ...

Forgive me for te depressed paradigm :D

وجهة نظر

2006-02-12T16:58:00.000+02:00

كل يوم الواحد بيكتشف شىء جديد فى كل يوم بيمر فى حياته , بصرف النظر عن نوع هذا الاكتشاف حلو او وحش او اذا كان مفيد او مضر او اى فى اى حاجة !!!

بس فى اعتقادى الشخصى ان اى اكتشاف يعتبر ايجابى حتى لو فى ظاهره مؤلم او سىء او مكئب !!! المهم ان انت توصل للاكتشاف و خلاص و يسلام بقي لو ربنا فتح عليك ووصلت لاسبابه , تبقى فعلا عديت !!!!

و المراحل المختلفة دى بتعتمد على الشخصية اصلا و ثقافتها و تربيتها و افكارها و حاجات كتير اوى ....

بس من وجهة نظرى ان اهم حاجة عشان تحل اى مشكلة هى شخصيتك و دى حاجة احنا كلنا عارفنها بس مش كلنا بيقدر ينفذ اللى هو عاوزه بسهولة !!! يعنى مثلا كام واحد فبنا عنده الجراءة انه يواجه مشاكله مع الناس ؟؟؟ طب كام واحد يقدر يواجه نفسه بصراحة , و يصدر قرارات على نفسه ؟؟؟ طب كام واحد اصدر قرارات على نفسه و قدر ينفذها ؟؟؟

الاسئلة دى كنت بسالها لنفسى و كل مرة بتهرب من نفسى و افتكر نفسى مجنون و بقيت بكلم نفسى ... بس فى الحقيقة الاسبوعين اللى فاته حصل حاجات كتيييييييير اوى خلتنى اراجع نفسى مليون مرة .... قبل ماخد اى خطوة فى حياتى!!!

المواقف اللى حصلت كتير و فى كل حاجة فى حياتى و فى كل جزء منها سواء من ناحية عيلتى او اصحابى او اخواتى او دينى او ترفيهى , و اخيرا اكتشفت مكمن المشكلة الرئيسية اللى انا بواجهها فى كل موقف بقابله و هو ترتيب اولويات حياتى.

كتير منا قرا المثال اللى الدكتور سال فيه الطلبة فى كيفية ملء البرتمان !!!! بس احنا اتعودنا نقرا و منفكرش!!! او بنقرا من غير مانفهم و بينى و بينكم انا مفكرتش فى اهمية هذا المثال الا لما بدات افكر فى الاسباب الرئيسية للمشكلة , اكتشفت ان انا كل اولوياتى مش مترتبة
الواحد بيتخيل انه مرتبهم صح و لكن للاسف احنا مس قادرين نواجه نفسنا , يعنى لو جيت سالت واحد ايه اولويات حياتك , تعالوا نشوف الرد النظرى , حيقول " الله و رسوله و بعدين اهلى و بعدين مذاكرتى و بعدين اصحابى و اخر حاجة انى ارفه عن نفسى" و ممكن يكون بيرد و هو قاعد على قهوة اصلا بيفرج على " هيفا " !! يعنى كل اللى احنا بنقوله هو اللى احنا عايزينه بس مش اللى احنا بنعمله , كم واحد سمع عن الاساءة للرسول الكريم و كم واحد خد موقف بجد ؟؟!! يبقى للاسف ان الله و رسوله لم يصبحوا اهم اولوياتنا !!!!!

طب بعد الامتحانات و اول مانخلص عايزين نجرى على اصحابنا عشان نخرج و سبنا اهلنا اللى كانوا بيسهروا الليالى علشان يبقوا جبنك و يصحوا كل يوم من النجمة عشان يخلوك احسن منهم ؟؟؟!!!! و من هنا يبقى اهلنا مش اهم من صحابنا , طب و كم واحد من صحابنا دول يستاهل ان احنا نسيب بيوتنا عشانه و نساعده , و كم مرة بنزعل عشان صحابنا نفضولنا و طنشونا و ماكلموناش و مابيسالوش عليتا !! انا نفسى صحابى عملوا فيا كده و كانت من اقرب الناس و كنت زعلان اوى , بس لما فكرت اكشفت ان انا الغلطان لان ان اللى خليتهم فى اولوية مش مكانها اصلا و ان انا اصلا مش مهم اوى كده فى حياتهم
فلقيت ان انا لازم اعيد ترتيب اولوياتى عشان اعيش حياة اسلامية صحيحة , لان حب الاسلام مش كلام و بس , و لازم احدد هدف ليا فى حياتى بس لازم يكون هدف جماعى علشان نقوى بعضنا لما نضعف , مينفعش كل واحد يطلع لعيب كرة جامد لوحده لازم كلهم يبقوا فريق واحد بيحبوا بعض و ليهم نفس الهدف !!!

لان بصراحة بعد اللى شوفته ايام مباريات المنتخب و طريقة الفرح المقززة و رقص البنات و سفالة الولاد , شىء محزن فعلا , اسالهم سوال هل زعلتم على رسولنا بنفس الحرقة زى مافرحتم للمنخب !!!! ولا ضحايا العبارة اللى نسيناهم لما المنتخب فاز

و انا بتفاهتى رحت مباراة النهائى , بس احمد الله ان شفت بارقة امل لهذا الشعب , و لما كنا وقفين و معانا تذاكرنا و بيقولولنا مفيش مكان جوا فى المدرجات و جابوا تعزيزات من الامن لما عددنا زاد و فجاءة اجتاحت ثورة غضب عارمة للجماهير و ضربنا الامن و دخلنا و لا كاننا حيوانات او حرامية !!! بس اكتشفت ان الواحد لو عايز بعمل حاجة حيعملها باذن الله , بس بكون عنده الارادة

من الاخر عشان الكلام كتر و بيعوم و قرب يغرق لازم نوحد هدفنا و عزيمتنا و ارادتنا و علمنا علشلن نعمل حاجة للاسلام و لوطننا و ربنا سبحانه و تعالى يرضى علينا ,

لان مفيش اجمل من الجنة كهدف و لا اجمل من الاسلام كطريق عشان نفوز بالجنة
بس كفاية بقى ذل و هوان !!!

ادعو الله ان يوفقنى و يثبتنى و ابقى قد قراراتى فى اختيار اولوياتى و مبقاش عايل بتاع كلام و بس !!! ادعولى ان ابقى اقوى من نفسى عشان انا كرهت نفسى خلاص

حنعملوا ايه من غيرى :)

2006-01-28T02:08:00.000+02:00

اخوانى و اخواتى

انا مسافر بكره ان شاء الله الاسكندرية يومين كده و راجع ان شاء الله , طبعا انا عارف ان اليومين دول من اصعب الايام اللى حتمر عليكم

طبعا عشان انا مش موجود (: ربنا يقويكم و يصبركم على بعادى اليومين دول :) صعبانين عليا

اراكم على خير ان شاء الله

يا انهار اسود !!!! حسبى الله و نعم الوكيل

2006-01-25T01:23:00.000+02:00

و مصيبتاه و اسفاه و يا ويلتاه و يا لهوى و الحقينى ياما

شفته المصيبة اللى حصلت , قرات مقالة فى جرنال الغد للصحفى ادهم احمد و بتقول ان سفير الدنمارك اساء للرسول صلى الله عليه و سلم , الراجل حس بغلطته و كان عاوز يعتذر فكلم عرة الرجالة شيخ الازهر علشان يبقى اعتذار رسمى امام العالم و تخيلوا بقى رد شيخنا المبجل و اليك نص المقال "قال الشيخ انه يرفض الاساءة للرسول لانه لا يصح الاساءة للاموات بصفة عامة لانها تتنافى مع المبادىء الانسانية الكريمة سواء كانت هذه الاساءة من الانبياء او الصالحين او السياسين او غيرهم ممن فارقوا الحياة و اضاف شيخ الازهر انه يرفض الاساءة الى الرسول لانه فارق الحياة مؤكدا ان الامم العاقلة الرشيدة تحترم الذين انتهت اجالهم و ماتوا و هذا ما تقتضيه العقول الانسانية السليمة " خلص الرد

بقى ده رد يا راجل ترد بيه؟؟؟؟ ده امريكا بتحارب دول عشان تسكت الاسلام و يوم لما الاسلام يطلع صوته تسكته انت و تقول الرسول مات , ده انت لو واحد غلط فى ابوك الله يرحمه حتقوم تموته , ولما حد يغلط فى الرسول تقول مش المفروض نغلط فى الاموات

اقسم بالله انا مش مصدق !!!! و نقول حالنا اتنيل ليه , العيب مش فينا احنا

على فكرة مش هى دى السماحة !!! دى اسمها قلة كرامة و ذل و هبل , يا جماعة العيب مش فى الاسلام , الاسلام حيفضل طول عمره عزيز , المشكلة فى المسلمين المتخلفين اللى بيبوظوا صورة الاسلام , ومصيبتنا ان اخنا سايبنهم

و انا لله و انا اليه راجعون و حسبى الله و نعم الوكيل و انا مش مسامح شيخ الازهر فى حقى كمسلم

لاء متقولش جزار !! هو عنده جزارة

2006-01-21T20:14:00.000+02:00

المظاهر يا جماعة حتودينا فى داهية !!!

المشكلة ان غالبية هذا الشعب اصبح متخلف , مالوش غير فى المظاهر الكدابة و الفارغة , مالهومش شغلانة غير الكلام و بس !!!

و ده فى كل مجال و فى كل شارع و فى كل واحد مننا بيحب الكلام و بس

حديكو شوية امثلة كده , هى خيالية بس مش قوى .... واحد اتخرج من كلية طب او هندسة مثلا و مالقاش شغل , فقال يشتغل اى حاجة و يصرف على عيلته اللى تعبوا عشان يربوه , نتخيل مثلا انه اشتغل جزار و لا مكوجى , و بدا مشوار الكفاح , و قال يكمل نص دينه و راح عشان يتقدم لبنت و قابل ابوها , وقالوا " يا عمى انا معايا بكالريوس هندسة و حبيت اشتغل فى تخصصى و عشان كده اشتغات جزار"

طبعا مش حيلاقى غير رد واحد "اخرج برا بيتى يا ابن الكذا كذا ......مشفر...... " , و يخرج المكافح و دمعته خده من الاهانه و كانه حرامى , حنفترض حالتين , الحالة الاولى : انه يقرر يبقى حرامى و ساعتها لو اتقدم لحماه الغبى حيقولوا " احنا بنشترى راجل "

الحالة التانية و هو ان المكافح يقرر تكملة كفاحه علشان يثبت للغبى انه غلط لما رفضه , وتدور الايام و يكبر المكافح شوية شوية و ربنا بفتح عليه بالحلال و يرزقه من حيث لا يحتسب , و نتخيل انه حيروح لنفس الحمى الغبى , و تعالوا نتخيل رد الحما و هو بيقول للناس

ا" انا جوز بنتى مهندس اد الدنيا و عنده اكبر محلات الجزارة فى البلد " , واخدين بالكو ماقالش جزار ... قال عنده جزارة , مايقولش مكوجى .....و يقول عنده مغسلة , ميقولش كهربائى ..... و يقول محل اضاءة و اكسسواراتها

معلش هى قصة مملة شوية بس انا عايز اوصلكو , ان نظرتنا للناس هى اللى بتحكم على التعامل , ليه بنبص للناس انهم اقل مننا عشان بيشتغلوا شغلة احنا مابنحبهاش , بعنى الزبال لو ماشلش زبالتنا , حنعيش حياة من الوباء و القذارة , السؤال هل واحد فينا فكر يشيل زبالته؟؟؟؟ الاجابة طبعا لاء لان لو كنا شيلنا زباتنا ماكنتش المهنة دى بقت موجودة اصلا !!!

ليه منحترمش الزبال و غيره اللى بيعملوا حاجات احنا مبنقدرش نعملها !!! و لازم نحسسهم بالاحترام ده علشان مايبقوش ماشيين فى الشوارع و هم بيمثلوا انهم بينضفوا عشان واحد يديلهم اللى فيه النصيب !!! واسفاه !!!

با جماعة الناس دى اهم مننا , احنا لو مانزلناش يوم من بتنا , مش حيحصل حاجة !!! بس هما لو منزلوش ؟؟؟؟؟

تخبل حاجة من دى لمل تعطل : العربية , السخان , البوتجاز , الحنفية , وغيرهم كتير

يا ريت نبص لبعض احسن من كده و بلاش نحكم بالظاهر و خلى الين و الاخلاق هى مقياسنا!!!

اتبرع و لو بتعليق !!! كفاية بخل و كسل

2006-01-17T20:55:00.000+02:00

لاحظت حاجة اثناء مرورى فى المدونات الاخرى ان كثير من البوستس لا يتم التعليق عليها مع ان عدد الزائرين يمكن كتر من 2000 مثلا و تلاقى المعلقين 4 و 5 ده اذا فى حد علق اصلا !!! يمكن الناس تفتكر ان انا كاتب الكلام ده عشان الناس تبتدى تقرالى و تعلق , اقواهم طب و ايه المشكلة ؟؟؟ اى حد بيحب الناس تقراله و تمدحه و تنقضه , بس يحس ان هو وسطهم

طب اسالكو سوال !!! انتو بتكتبوا مدونات ليه ؟؟ عايز تكتب اللى فى نفسك , و فى نفس الوقت عايز حد تانى يشاركك رايك , يفكيرك , احساسك , و الا كل واحد كان بكتب فى شوية ورق فى بيتهم و ميخليش حد يشوفهمم !!! و كتير منا و انا واحد منهم نقرا البوست و نكسل

نعلق , او نوصل لنصفه و نزهق او مش فاهمين !! طب و ايه المشكلة ؟؟ مانعلق و نقول راينا سواء مش فاهم او زهقت او الموضوع مش عاجبك , اى حاجة بس نحسس بعض ان احنا مع بعض , كفاية بأه نعيش كل واحد لوحده فى سلبية و انهزام , ليه منساعدش بعض

للى حيقرا الكلام جه انا عوز اطرح سؤال عليهم ؟ هل بتبقى فرحان و لا زعلان لما بنلاقى حد معلق على حاجة احنا كتبناها !! اعتقد ان احنا بنفرح , كتير من الناس ممكن ميعجبهاش كلامى و يقولوا ان الناس لو عجبها موضوعك حتعلق , هم اكيد صح بس دى مسالة نفسية

زى ماشوفت مرة احد البوستس الرائعة و موضوع كان جامد موووت بس مفيش ولا معلق , بذمتكم صاحبة المدونة ماجلهاش احباط و لو وقتى !!! اعتقد ان لو في تعليق سطر واحد ماعتقدش انه حياخد وقت فى كتابته

لذلك نناشد ذوى القلوب الرحيمة ان تتعاطف مع المبتدئين , واتبرع و لو بتعليق , ترسم بيه بسمة على وشه , تكون لك حسنة فى ميزان مدوناتك :)

جيل نانسى و روبى

2006-01-15T01:57:00.000+02:00

الاطفال ضاعت و راح اللى راح !!!

الاطفال ما بقوش اطفال خلاص دول بقوا اوعى منى و منكم , و الواحد كان ممكن يفرح لو كان العيال دى كانت فلحت فى علم و لا رياضة و لا ثقافة عامة و معلومات

طبعا حتسالونى ايه اللى خلاك تحكم عليهم و هم ليسا ماطلعوش من البيضة ؟؟ الموضوع بسيط تعالوا نشوف شباب اليومين دول , و حالهم بقى عامل ازاى ؟؟؟

عدت ايام العيد و كانه عيد الخمر و النساء , و نشوف القهاوى , عفوا قصدى الكافيهات - القهاوى دى للرعاع امثالنا - لان الكافيهات مينفعش يدخلها غير كل ولد و معاه بنت و لا قدر الله اذا دخل اتنين صحاب مع بعض تلاقى الناس بصالهم بصة غريبة و ممكن يفتكروهم

....(مشفر)..... , و زحمة الشوارع علشان الشباب يظبط و البنات تحس بانوثتها فى المعاكسة , و الخناقات اللى بين الشباب على البنات , قال يعنى من بقيت اهلهم مثلا , (كل واد عايز يطلع دكر ادام البت ) , ولا حول و لا قوة الا بالله

تعالوا نرجع بالذاكرة شوية و نحاول نفتكر ايه هى ثقافة شباب دلوقتى ؟؟ ثقافتهم هى التلفزيون بالاريال اللى لما كان بيجيبوا الاريال ابو 8 قنوات , كان انجاز غير معهود , و كل ده علشان نتفرج على " بوجى و طمطم , مازنجر , كابتن ماجد , بقلز و زقلط " و البرامج المفيدة زى " عروستى , او البرلمان الصغير " اللى كانت يتزيعهم ماما سو.... معلش - اصلى متعود - قصدى ماما سامية شرابى , و كنا نتفرج على الاعادة فى باقى المحطات , و بعد كل ده بص الجيل بقى عامل ازاى !!!!

نشوف دلوقتى الثقافة المتوفرة للاطفال دول , ما شاء الله حاجة تفرح , طول اليل و النهار ادام الدش بيتفرجوا على قنوات اغانى ولا و لا ..

و الدش دلوقتى بقى فى كل مكان فى مصر , نبص نلاقى بيت من الطوب اللبن و فوقه دش اد الداهية اكبر من البيت نفسه!!!

تعدى فى مناطق شبه مخيمات و بيوت من دور واحد و كل واحد شايل الدش فوقه , زى ما يكونوا بيتعرفوا على كائنات اخرى فى الفضاء الخارجى, و الكل بيتفرج على نانسى ولا هيفا و لا ...........

تخيلوا بقى جيل متربى على نانسى و روبى , بذمتكم ده جيل ينفع ببصلة , و نعد نقول ان هو ده الشباب اللى حيبنى البلد

و انا لله و انا اليه راجعون

هيركليز قاهر المعيز

2006-01-08T19:24:00.000+02:00

كل سنة و انتم طيبين بمناسبة عيد الاضحى المبارك

ساعات معدودة ان شاء الله و ييجى العيد بخيره و ببركته علينا , و نقوم بالسنة الجميلة اللى بيحبها الرسول - صلى الله عيه وسلم - و هي ذبح الاضاحى اللى بتقرب المسلمين من بعضهم و تنشر الحب و الخير و الفرحة فى قلوب الناس

بس ليه فى البلد دى دايما اى حاجة جميلة لازم يبقى معاها حاجة وحشة تبوظها , طبعا حتسالونى طب هو ايه الحاجة الوحشة؟؟

تعالوا نشوف منظر الشوارع بعد الذبح و بحور الدم و اكن التتار غزوا البلد , منظر الجزارين و فى ايديهم الصواطير و الدم على هدومهم محسسنى انه - وليام والاس - قال يعنى لما يبقى نظيف حيفقد لقب " هيركليز قاهر المعيز " , وتبقى ماشى في الشارع تقفزما بين انهار الدم و ريحتها فى انفك , اكيد مش ده الصح لان السعودية نفسها-الدولة الاولى فى تطبيق السنة - عملت مجازر الية

يا جماعة يا ريت نفكر فى حل للتوعية العامة , يا ريت نشغل مخنا اللى بقى بطاطساية

و فى الختام كل خروف و انتم طيبين

الحمد لله على كل حال

2006-01-06T11:25:00.000+02:00

والله الواحد يحمد ربنا الف مرة على اى حاجة بتحصلنا , حتى المشكلة اللى حصلت مع اقرب الناس لية , سبحان الله تلاقى ناس تانية عمرك ما كنت تتوقعهم , وقفوا جنبك فى الشدة , وعايزين يعملوا اى حاجة عشان يساعدوك , ربنا يستر و مايكونوش بيتمصلحوا , فكرنى ببيت شعر بيقول

" ما ضاقت و استحكمت حلاقتها الا ما فرجت و كنت اظنها لا تفرج"

الحمد لله فعلا هو ارحم الراحمين

هفاء = كيس جوافة = طرطور = قمع = اللى كتبها

2006-01-05T01:30:00.000+02:00

يا جماعة انا باعترف و امام الجميع ان انا طلعت هفاء كبييييييير جدا

و الله يا جماعة مش عارف اقول ايه !!! بس فيه احساس كده بييجى للواحد لما بيحس ان هو طرطور او كيس جوافة - ليها معانى كتير - بس المهم ان انا حسه , تقريبا انا وصلت للتشبع !!! تخيلوا لما نفضل نخلص لناس و نخدمهم بعنينا و عمرنا ما بنطلب منهم حاجة ابدا , و المرة الوحيدة اللى نبقى فعلا محتاجنلهم فجاءة تلاقيهم فص ملح و داب و يا ريته اعتذر ولا حتى شرح السبب اللى خلاه يخلع بصنعة لطافة , ابدا و لا اكن فى مشكلة اصلا و تبقى انت قاعد مش طايق دبان وشك و هو ولا على باله و الله اعلم يمكن يكون فرحان ان انت زعلان علشان يحس باهميته بالنسبالك و بيبقى عايش حياته عادى جدا , اصل المشكلة ان احنا بنعامل الناس باصلنا مش باصلهم

البنى ادم ده شىء عجيب , لحظة لما يحس انه بقى مهم ياخد قلم فى نفسه , و يبتدى يطنش الناس اللى اعتبروه محور حياتهم , علشان يتحايلو عليه اكتر عشان يفضى مكان فى مواعيده عشان يكلموا معاه شوية , بس لو اديناله بالجزمة فوق دماغه حيتربى , هو كده ديل الكلب عمره ما يتعدل , ما انا بردوا حمار ايه اللى بخلينى اصاحب كلب , انا بعد كده حاصاحب قطط ولا لاش دى بتاكل و تنكر ,المفروض اختار حاجة من نفس فصيلتي حمار وحشى لذيذ كده يفهمنى و افهمه اهه على الاقل لما بيشوف الشيطان بينهاء ,احسن مننا بنمشى وراه

ايه رايكم يا جماعة نعمل منظمة الطراطير المحلية شوية شوية تكبر المنظمة و تبقى دولية و صاحب المركز الاول هو اقل واحد عنده طراطير , اهه على الاقل نقف جنب بعض , شكلى اجننت يا جماعة , معلش ليس على المجنون حرج

يا رب خليهملى !!! بحبهم اوي والله

2006-01-04T18:18:00.000+02:00

يا جماعة ادعولى ان يوم 22 ييجى بسرعة و على خير , أكون ان شاء الله عملت كويس فى الامتحانات

بجد نفسى أشوف عائلتى الجديدة - مش ابويا و امى و اخويا , طبعا بحبهم جدا - لكن الناس اللى بحكيلكم عليهم عملنا مع بعض عائلة جميلة

بحبهم و بيحبونى مش عايزين منى اي حاجة , بيحبونى لوجه الله من غير نفاق ولا خداع مش زى اغلب الناس التانية اللى احنا بنفتكرهم صحابنا و يقولوا كلام فى وشنا و كلام تانى فى ظهرنا , كل قاعدتنا ضحك و هزار و مسخرة كل واحد بيحترم التانى و بيخاف عليه و على مشاعره و لما بنزعل من بعض ده علشان نفسنا نبقى علطول جنب بعض مش مستانين شكر, مفيش افش ولا كآبة اكتشفت ان الناس دى هيا المفروض نعرفها و نحبها علشان نواصل حياتنا و حاسين ان الدنيا ليسة بخير

و اقول يا رب خليهملى و ما نتفرقش ابدا

على فكرة احد افراد هذه العائلة هواحد المبلوجين اللى خلاني ابداء هذا الموضوع واثر كثيرا فى شخصيتى

بلدية !! بلدية !! - متقلقش احنا حرامية -ااه

2006-01-04T01:14:00.000+02:00

الحقوا بلدية !!! اجرواااااااااااا

جملة بنسمعها فى اى مكان فى مصر فيه سوق !!! بس الواحد مش عارف مين الظالم و مين مظلوم ؟؟ الناس الغلابة دى اللى بيجروا ورا كوم لحم وعايزين يسترزقوا بالحلال , وقال ما تسمع كلمة " بلدية " و فى لحظة تلاقى الناس بتجرى من حوليك فى كل الاتجاهات و المناظر اللى مينفعش نشوفها غير فى مصر , نلاقى واحدة ست غلبانة تحولت الى خليط من الرياضات المختلفة ,فى الحظة دى تتحول الى عدااءة و حاملة اثقال و لاعبة جمباز - بسم الله مل شاء الله , اللهم لا حسد - و بعدين تروح لافعة ابنها على كتفها و شايلة على رقبتها كمية حاجات لا يتخيلها عقل و نكمل السيناريو المعهود وتخش عربية سوزوكى تبع الطبقة الكادحة المكافحة وتلاقى كل عناصر الكفاح بترمى كل راس مالها في العربية و المناظر المؤثرة التراجيدية انك تلاقى عناصر فدائية تعمل شوية شغب علشان يهربوا الباقى , والله اباركلهم و اهنيهم على الروح و الحب اللى كتير اوى منا فقدها

بعد المنظر ده حسيت زى ما يكون الناس دى حرامية مش ناس بتكافح على قوت يومها !!! السؤال اللى نفسه اسأله هيا الناس دى المفروض تعمل ايه ؟؟؟؟ هل المفروض انهم يسرقوا ولا يبقوا تجار مخدرات ولا يبيعوا بلدهم لغيرهم ولا ولا.... ؟؟؟؟هو الظاهر و

الله اعلم انهم لو سرقوا او ... او ... او ممكن فى ناس تبيع شرفها , تقريبا ممكن ميحصلهمش حاجة و لا يجروا و هما خايفين

لان ساعتها الناس دى حايبقى معاها فلوس و ممكن يتصرفوا من غير مايحصلهم اى حاجة وبعدها لو سمعوا النادورجي بيقول " بلدية حيردوا و يقولوا ماتقلقش " احنا دلوقتى حرامية اد الدنيا " و ساعتها مش عارف ازاى ممكن نلومهم ؟؟

احنا كده بقينا بنخسر انتماء الناس للبلد دى اللى احنا المفروض نطورها و نبنيها علشان بنجرى ورا ناس وبنسي ناس تانية , اللى انا استنتجته ان عساكر المرور من كتر ما بقوا بياكلوا , كرشهم بقلظ و كبر , فبقوا مش قادرين يجروا فبقوا بيجروا ورا اى حد , ربنا معاهم

2006-01-02T14:10:00.000+02:00

نزلت انهارده عشان اشترى لمبات كهرباء فدار حوار بين البياع -اسمه هشام - و بينى , رجل ظريف مش إتم

المهم قلتلوه عايز 10 لمبات من النوع ده وكان معايا الكرتونة بتاعتها و كان اسمها " اتحاد اوروبى " فبغبائى طبعا كنت فاكرها مصنوعة فى اوروبا فجابلى نوع تانى غير اللى طلبته فقلتله بهبالة شديدة "لاء أنا عايز الاوروبى " , هشام بصلى و ابتسم ابتسامة سخرية و قاللى " يا بيه كله صينى " فقلتله" هو خلاص مفيش مصرى ولا ايه ,

و(نيازا) راحت فين؟؟ " رد هشام و قاللى " نيازا ايه يا بيه , هو في حد بيشترى المصرى دلوقتى , ده الناس بتيجى تطلب اى حاجة الا المصرى !!! " مابئتش عارف اضحك ولا ابكى على حالنا بس اللى عجبنى جدا فى الحوار انه كان بيقوللى " يا بيه" فعلا احنا شعب بتاع كلام و بس

2006-01-02T11:38:00.000+02:00

حاجة غريبة جدا

من يومين كنت باتفرج على التلفزيون و كنت باتفرج على فيلم و بعدين جالفاصل و بدات الاعلانات ترف ورا بعضها و كل العلانات عن مصر !!!! و اتفرج يا عم على العلانات كلها ازاى توفر ربع جنيه و نصف جنيه حسيت زى ما يكون المصريين بقوا يهود و البخل بقى بين ضلوعهم و العلانات غى كا المجالات - ثمن دقيقة الموبايل , مساحيق الغسيل , المرقة - قال يعنى لما اعرف ان ام فاروق شالت بقعة البرقوق هاى هاى حاجرى و اشترى السحوق ......اللى نفسى اعرفه الكلام ده موجه لمين؟؟؟ اصل الفضائيات لازم تدفعلها اشتراك و كلنا عارفين ان الشتراك بالميات اكيد مش حيفرق مع المشاهد ربع ولا نص جنيه!!! حاسيت ان انا مكسوف لان مش هو ده منظرنا و بعدين حتى لو احنا شحاتين مش لازم نفضح نفسنا و فى نفس الوقت مانعملش نفسنا ولاد السفيرة عزيزة

كل حاجة بالمعقول كويسة و بعدين الرقابة غى العلانات ماتبقاش على الحاجات الاباحية فقط لازم يبقى فى رقابة من نوع تانى علشان تحافظ على مظهرنا و كرامتنا , والله انا حاسس ان لو رحت اشتغل غى الخليج مثلا حايجى صاحب الشغل و يقوللى يحنن

بجد شىء يحزن !!!!

الطرق في مصر

2005-12-28T11:39:00.000+02:00

كنت عايز اتكلم عن أجمل ما أراه فى مصر و يمكن اعتبارها 8 عجائب الدنيا ألا و هي الطرق ,ما شاء الله حاجة تفرح, تحس إن انت في سباق رالى و الظاهر إن زمان كانوا حاسين أن ممكن الحرب تدخل فى شوارع و ضواحى البلد, فحبوا يجهزوها فعملوها بضمير اوى على غير العادة

تعالوا نتخيل نفسنا نازلين في يوم عادى الساعة تقريبا 7 مساء - تقريبا مفيش ضوء - لأن طبعا نصف شوارع مصرمفيهاش عواميد نور أصلا و نصف النصف الثانى مابينوروش

ننزل ندور العربية - ده اذا دارت اصلا - و نتكل على الله علشان نروح مشاورنا و نخرج من شارعنا الهادى - اذا كان هادى - تلاقى نفسك وسط مجتمع راقى من سواقين الميكروباصات و التاكسيات و شعارهم اللى يحصلنى يكسرنى و اللى يفوت يموت , سيبك من المؤثرات الصوتية و العوامل الخارجية و نركز في الطريق تلاقى نفسك امام خندق هو تقريبا كان مكان لرقود الجنود تحت الدبابات لوضع القنابل من تحتها, طبعا اذا ربنا كرمك و شفت الفخ و لحقت تفرمل كده بتعرض نفسك لمجازفة ان مفيش حد حيخبطك من ورا

و لو ربنا مكتبلكش ان انت تشوفه حتحس ان العربية بتتقطم منك و حتسمع صوت من اتنين اما فرقعة كاوتش او صوت و كأن فى قنبلة انفجرت تحت العربية و ننزل و نشوف العربية و نقول الحمد لله ربنا ستر

و طبعا يأتى اصحاب العقول المشرقة و الأفكار النيرة فيفكروا فى حل جديد و طبعا اللى هو مطب صناعى - عفوا قصدى جبل صناعى - قبل هذا الخندق , المشكلة كده زادت بعد عمل هذا الجبل لأن انت كده ولا حتشوف الجبل و لا الخندق طبعا لأن المشكاة أصلا فى العواميد

حاولنا نعرف هو ليه العواميد مابتنورش عرفنا ان كان فى مسئول بيتفرج على مسلسل "و انا مالى يامَا " وطبعا مينفعش يقطعوا الكهرباء

نروح مع بعض لطرق اسرع شوية بيكون فيها تدريب جيد ازاى تفادى غطا البلاعات اللى هي يا اما فوق مستوى الشارع او تحته و تبدأ المناورات لتفادى هذا الحقل من الألغام , واول مانخلص نرجع للمشكلة الأولى و هو المطب اللى فى اخر الشارع , بس كنت عايز ابشر اصحاب السيارات انهم مايخافوش بعد اى اختباريا اما حيلاقى واحد بتاع كاوتش او ميكانيكى على حسب المشكلة اللي كانت فى الطريق

نروح لطريق اسرع شوية مفيهوش مطبات بس فيه اختراع جديد اسمه عيون القطط و دى ميزتها ان مفيش حد بيهدى بس يسلام عليك و انت بتتنطط مع عفشة العربية و تسمع صوت و كأن اتفتح عليك خط نار و تحس ان العربية بتتفكك , تحس ان شوية شوية حتلاقى نفسك على الكرسى و عجلة القيادة فى ايديك وبس - كل شىء سليم بس مستقل بذاته - تخيل معاناة الكاوتش

واجمل ما فى الطرق عدم الرقابة - متفهمونيش غلط - قصدى تلاقوا عربية نقل محملة رمل مثلا و وقعت ربع اللى هي شايلاه في الطريق و بالتالى حضرتك لما تفرمل وكأنك معملتش اى حاجة , تحس ان انت راكب حوامة فضائية طائرة

و نتيجة لهذه المشكلة الصغيرة العربية حتلف بيك (حتعوم) و كده يا حتلبس يا فى شجرة يا فى عمود و الميزة هنا ان انت حتقف , بس فى مشكلة بسيطة ان هم حيخلوك تدفع ثمن الشجرة او العمود و ممكن يتهمك ان انت اللى بوظت الكهرباء اللى فى العمود مع العلم ان هو اصلا لو كان منور كان الراجل دخل بالعربية في الشجرة

فى آخر اليوم ترجع تركن العربية تحت بيتك و تبصيلها بعد لما تنزل منها تلاقيها عجلة حربية بيجرها حمارين

استئذنكم يا جماعة انزل اركب دبابتى الجديدة عشان اروح ازور واحد صاحبى فى المعسكر بتاعه , بينى و بينكم اصل انا بعت العجلة الحربية .. عقبالكم